काठमाडौँ, २२ असोज । नेकपा (माओवादी केन्द्र) का नेता तथा पूर्वमन्त्री सुदन किरातीले हालैको ‘जेनजी विद्रोह’ ले पुराना राजनीतिक नेताहरूलाई विस्थापित गर्दै नयाँ पुस्ताको उदयको बाटो खोलेको टिप्पणी गरेका छन् । उनले २००७ सालदेखि ०८२ साल सम्मका सबै आन्दोलनले नेतृत्व जन्माए पनि यो विद्रोहले सबै पुराना नेताहरूलाई कमजोर बनाएको उल्लेख गरे ।
उनले भने, “जेनजी आन्दोलनले देशमा राजनीतिक सफाइको माग उठायो, तर अन्ततः रक्तपातमा परिणत भयो।” भदौ २३ गतेको घटनालाई उनले “नेपालको इतिहासकै दुःखद मोड” भनेका छन् । किरातीले जेनजी नेतृत्वलाई शहीदहरूको बलिदानलाई संस्थागत गर्न र गणतन्त्र, सङ्घीयता, समावेशिता र धर्मनिरपेक्षताको रक्षा गर्दै नयाँ राष्ट्रिय संस्कृतिको निर्माणमा ध्यान दिन सुझाव दिएका छन् ।
उनले चेतावनी दिँदै भने, “यदि नयाँ पुस्तामाथि पनि विश्वासको सङ्कट बढ्यो भने नेपाल असफल राष्ट्रको दिशातिर धकेलिन सक्छ।”
