माडीका किसानलाई चैते धान सम्हाल्न चटारो

माडी,  जेठ २७ । चितवनका माडी क्षेत्रका किसान लाई यति बेला चैतमा रोपेको धान थन्क्याउन भ्याइ नभ्याइ परेको छ । धान पाकेर खेतभरी झुलिरहेको अवस्थामा बर्खेधानको समेत तयारी गर्नु पर्ने भएपछी किसानहरु लाई धान सम्हान चटारो परेको हो ।

बिगतका बर्षहरुमा सिचाइ सुबिधा भएका क्षेत्रमा विभिन्न जातका मोटो धान लगाउने गरिएको भएपनि यसपटक भने चैतमा टाइचिन जातको धानको बीउ ल्याएर लगाएपछि उत्पादनमा समेत वृद्धि भएको छ ।

लामो समय देखि आफुहरुले चैतेधान लगाउने गरेको भएपनि उत्पादन न्यून हुने गरेको भएपनि यसपटक टाइचन धानको बीउ ल्याएर रोपाइ गरेपछि धान उत्पादनमा वृद्धि भएको माडी नगरपालिका वडा नम्बर ७ जगन्नाथपुरीका स्थानिय खेमलाल पोखरेलले बताए। बिगतमा दुख अनुसारको उत्पादन नभएपछि आफुहरु सधै निरासामा रहने गरेको भएपनि यसपटक टाइचन जातको धान लगाएपछी ३ कठ्ठा जमिनमै ८ क्युनिन्टल धान उत्पादन भएको बताए ।

टाइचन जातको धान माडी क्षेत्रमा हावापानी सुहाउदो रहेको र उत्पादन समेत वृद्धि भएकोले आफुहरु पनि उत्साहित भएको माडी ७ दिवानगरका किसान खडानन्द सुवेदीले बताए । उत्पादन राम्रो भएको र बिक्रीका लागि बजार भाउ समेत राम्रो रहेकाले आफुहरु खुशी रहेको उनको भनाइ छ । माडी क्षेत्रमा चैते धान चैतको पहिलो साता रोपिएको धान जेठ अन्तिम साता काटेर धन्क्याउने गरिन्छ । बर्षादको समय भएका कारण सुरक्षित तरिकाले धान थन्क्याउन तथा पराल जोगाउन आफुहरु लाई हम्मे हम्मे हुने गरेको उनिहरुको भनाइ छ ।